ليه بنفشل في حياتنا الزوجية وليه محدش مستحمل حد وليه أصبحنا بنبيع بعض بسهولة؟!
كتب : مصطفى جاد
أسباب كتير منها البعد عن الدين الصحيح ومنها الضغوطات الأقتصادية الطاحنة ومنها عدم التأهيل للزواج وفهم قدسية الزواج ومنها اختيار من لا يتناسب معي ومع ظروفي.
بنفشل لأننا لدينا رصيد متراكم من الندبات والعقد بسبب التربية الأسرية الخطأ لم نتعافي منها فبندخل منظومة الزواج بعقد وبيزداد الأمر سوءا .
بنفشل لأن فيه هجمة ثقافية خارجية جعلت المفاهيم و الحقوق و الواجبات ودور الأسرة وأهميته متلخبط عند البعض وصنعت وعيا مزيفا لا حقيقيا النساء في الغالب ولا نعمم فمن عمم فقد أخطأ مش فاهمين يعني إيه راجل ليه حق الطاعة في المعروف ومش فاهمين يعني إيه معني كلمة أنثي ويعني إيه حسن تبعل ويعني إيه توازن بين دوري مع الأولاد ودوري مع الزوج ويعني إيه إني أم وزوجة ولست أم فقط يعني إيه مينفعش أكون ند للراجل وأعامله بعند لأنه هيوصله وقتها شعور إني واحد صاحبه ومش مراته يعني إيه أدعم زوجي حين يمر بظروف الحياة الصعبة يعني إيه لا أحمله ما لا يطيق من النفقات.
والرجال أغلبهم ولا نعمم فمن عمم فقد أخطأ مش فاهمين يعني إيه قوامة ويعني إيه مسؤولية بيت ويعني إيه إنك لازم تتشقلب علشان تكفي أهل بيتك ويعني إيه طبيعة أنثي تحكمها العاطفة وتحتاج معاملة خاصة وصبر ويعني إيه احتواء ودعم ويعني إيه عدم الانسياق وراء النزوات وتقدير المصالح والمفاسد للأسرة ويعني إيه إن أنت رمانة الميزان والقوام والداعم أصلح الله بيوتنا وردنا إليه سبحانه مردا جميلا ورزقنا اتباع سنة نبينا صلي الله عليه وسلم الذي علم النساء أن الرجل بالنسبة للمرأة هو جنتها أو نارها وعلم الرجال اتقوا الله في الضعيفين ومنهم المرأة عاملها برحمة عامليه إنه حاجة كبيرة أوي وستتساقط كثير من المشاكل تلقائيا كتساقط أوراق الشجر.
