كتب: مصطفى جاد
نكشف الستر ونتتبع العورات. نتكلم في حاجات مبنفهمش فيها ومبتخصناش. محدش يسلم مننا. نصدر الأحكام ونجَلِد بالسنتنا كل اللي يختلف معانا. أصبحنا كالرويبضة؛ خناقة بين واحدة وحماتها لازم ندلي بدلونا كإننا عارفين التفاصيل وكنا معاهم. فلانة اتخانقت مع فلان، فلان طلق فلانة. إحنا مجتمع متنمر، هماز، مشاء بنميم، وبيتدخل فيما لا يعنيه.
وعي جمعي متحيز ومتَعفن، مليان تشوهات معرفية. إحنا شطار في إننا نجلد في بعض، لا نلتمس الأعذار ولا نمارس الاعتذار. مابنرحمش أي حد يقع أو يتعثر، وكأننا ملائكة وهو الشيطان الوحيد. إحنا عايزين جنازة ونشبع فيها لطم. العيب مالينا بس إحنا شاغلين نفسنا بعيوب غيرنا.
