إحترام .
بقلم – علا سعيد
الإحترام كلمة بتُترجم بأشكال مختلفة من شخص للآخر ..
فتلاقى ناس بتشوف إن الإحترام هو عدم التطاول والغلط فى شخصك سواء بلفظ أو فعل ..
طب هل ده هو مفهوم الإحترام اللى يبنى علاقات ناجحة ؟
شخص يتكلم بطريقة مهذبة وميتعداش لفظيا هل ده فقط مفهوم الإحترام الكافى ؟
وليه فى إجماع من معظم المختصين بالعلاقات على إن الإحترام هو الأساس لأى علاقة ناضجة وناجحة؟
يالاه بينا نقول إيه هو الإحترام وأشكاله .. وليه العلاقات بتفشل من غيره
أولاً الإحترام فعل بيعلى قيمة العلاقة .. وما أدراك ما القيمة ..القيمة دى هى الزتونة .. والوجبة الدسمة اللى بتخلى للعلاقة معنى بتخلي العلاقة كافية ومُشبعة ومبهجة ..
إنك تحترم إنسان يعنى تراعى أسلوبك وكلماتك ونبرة صوتك ونظراتك .. تحترم حدود وحرمة الشخص وتحترم آدميته وده الأساس والقاعدة والحد الأدنى للإحترام فى جميع العلاقات اللى فى حياتك من أول حارس العمارة لحد رؤسائك فى الشغل .. افتكر ان ده الأساس مش تفضُّل منك ولا جميل فى اللى قدامك ده ..أ ..ب إحترام ده حقه فركز ..
ندخل على دايرة العلاقات القريبة منك اللى بتتعامل معاها بشكل يومى وقريب ..العلاقات اللى هتتسأل عنها قدام ربنا .. العلاقات دى فى إلتزام فى رقبتك تجاهها فيها حقوق ناس مش بالمزاج ..
طبعا لازم فيها الأساس اللى قولناه ده.. أ ..ب ..مش محتاجين نأكد عليه ..
يزيد عليه بقي انك تحاول تتعرف على شعور غيرك تجاهك وتجاه العلاقة وتحترم الشعور ده وتحترم صراحته وتصريحه ..وده أعمق درجات الإحترام اللى بتخلى العلاقة كافية ومُرضية للطرفين ..
وتحاول تعرف الطريقة اللى يحب يتعامل بيها ..والطريقة اللى بيشعر بيها انه سعيد ..و تحترم رغباته ..أحلامه.. طرق إشباع شعوره تجاه العلاقة ..لغته فى الحب .. بمعنى مينفعش يبقي لغه ابن أو زوج أو زوجة هى إنه بيحب التصريح والتعبير وده الشكل اللى بيفهم بيه المحبة وانت تبقي صامت وتجبله هدايا عشان تعبر عن حبك ليه ..
افتكر لو عايز علاقاتك ناضجة لازم تكون ناضج كفايا فى التعامل ..
” حب اللى قدامك بالطريقة اللى يحب يتحب بيها ” واضحة .. وهى دى مُعضلة الإهتمام اللى بتتسبب فى مشاكل كتير فى العلاقات والأخطر مشاكل مش ملموسة .. فيبقي شخص شايف انه عامل اللى عليه طول الوقت واللى قدامه مش مقدر.. وفى الواقع هو مش مدرك ايه اللى عليه أو مدرك جانب واحد بس منه .. والطرف الآخر مش عارف يعبر ويتوه فى أسئلة منهكة ..هو انت كويس وانا اللى طماع؟ ولا انت اللى قدراتك كده فمطلبش منك تفهم؟ طب لو انت كويس انا ليه مش مرتاح؟..هو انا بطلب المستحيل ؟ أسئلة كفيلة تعمل فجوة كبيرة فى العلاقة ..
فتلاقى إستشارات من نوعية ..
” هو شخص محترم مبيغلطش فيا بس انا مش مبسوطة” ..
“وهى ست كويسة شايفه واجبتها بس انا مش سعيد” ..
“بابا أو ماما بيجبولى كل حاجة بس مش ده اللى انا عايزه “..
شكوى غيرك هنا وإحساسه بعدم الرضا مش دلع ومش طمع منه .. ده إحتياج نفسي لازم تتفهمه وتحترمه وتراعيه وإلا هيعمل فى العلاقة مشاكل من النوع الخبيث اللى مش باين ولا معروف..من النوع اللى بيخنق المودة والونس وبيعمل نفور ..وبيسبب تعاسة وعدم رضا ..وفى لحظة ممكن تتهدم علاقة والسبب ميكنش معروف ..
يبقي ملخص الإحترام هو إنك تراعى كلامك ونظراتك وأسلوبك وتتفهم إحتياجات وأحلام اللى قدامك وتتعرف على طرق إسعاده وتلتزم بيها .. لو مش هيكون وجودك إضافة سعادة وخير لحياة غيرك إحترم نفسيته وإمشي قبل ما تكون مصدر أذى متتسببش فى تعاسة وهدر عمر لشخص توسم فيك الخير .
أخيرا افتكر إن الإحترام هو القيمة والرصيد فى عمر العلاقة .. فلما تغلط ده الرصيد اللى بيسد وراك ..
غير كده .. ليه غيرك يتقبل أخطائك فى حقه ؟؟ ليه يتحملك وانت مقدمتش أو قدمت اللى يرضيك انت ..
الإحترام بيهذب أنانيتك بيرتقى بيك أولاً ثم بالعلاقة ..
ابنى وإصلح وجمّل علاقاتك بالإحترام .. وأوعى تتنازل عنه مهما كلفك الأمر ..وافتكر ان الإهتمام شكل من أشكال الإحترام.
