كتب : مصطفى جاد
قتل المودة والرحمة فى ( 10) خطوات ، في بعض حالات الطلاق بتصر الزوجة إصرار غريب علي الإنفصال رغم الخسائر المادية والنفسية والزوج بيكون في ذهول ومش مصدق ان ده بيحصل بجد ؛؛ وبيحاول الزوج إيذاءها بكل الوسائل علها تتراجع عن قرارها و وسائل الضغط بتكون كالآتي :- ضغط بأهلها ، حرمانها من عيالها ، منعها
من شغلها لو بتشتغل ، حرمانها من مصروف البيت لو ما بتشتغلش .
النتيجة : إصرار الزوجة علي الطلاق اكثر وبشده
وكأن كل الضغوط اللي كان بيعملها الزوج عشان يرجعها بيبعدها بيها
عنه اكثر ؛ وماشاء الله مفيش راجل بيتعلم من غيره كلهم بيمشوا نفس الطريق وبيوصلوا لنفس النهاية كل مره لا وبرضو بيقعدوا قدام المأذون متفاجئين ومش فاهمين هي ليه الزوجة مصرة على الطلاق كده ..؟!
هنشرح كام علامة يمكن تلحقوا نفسكم قبل ما توصلوا لخراب البيوت :-
١- هتبدأ تشوفها ساكتة وحزينة وشغفها للحياة قل ؛ وساعات تانية مجنونة ومليانة طاقة وعماله تقولك أفكار ، وأحلام مش واقعية عشان تكسر حاجز الملل ، وساعات تالتة هتتخانق معاك علي اتفه الأسباب وتسكت في نص الخناقة فجاءة
تنزل علي مفيش .
٢- هتطلب منك انكم تخرجوا او تعملوا أي تغيير في حياتكم .. حضرتك هتقولها مشغول ..!
٣- هتقولك ان الحياة بدأت تخنقها وان رمي المسئوليات الكتير عليها وأهمالك ليها بيفقدها أنوثتها يوم بعد يوم ، وحضرتك هتشوف ان ده دلع ستات فارغة وإنها فاضية وإنها مهملة في نفسها ، وحضرتك هتلف تعمل علاقات وتخونها .!
٤- هتسامحك لما تخونها وهتقولك تعالي نفتح صفحة جديدة ونبدأ نتعرف علي بعض من جديد ، ونفهم إحتياجات بعض أكتر ونشبع بعض عشان ما تحتجش تخون تاني ..؟! وهيبقي رد سيادتك : ما خلصنا بقي أنتى هتفضلي تذليني بالحوار ده لحد امتى ؟! معنديش حاجة اديهالك عايزة تقربي قربي انتى !
٥- هتبدأ تتشقلب وتفتح معاك مواضيع وترتب خروجات او مفاجئات وتنظم سفريات ، وتحاول إنها تخلق علاقة حقيقية معاك عشان نفسها تعيش بجد مش عيشة والسلام ، هيبقي رد فعلك ؛ انتى فاضية اووى كده ليه ..؟! ما تشغلي نفسك بحاجة ! لما تعوزى تخرجي كلمى حد من صحابك واخرجى معاها ؛؛ مشاكلك النفسية دي شوفي دكتور يعالجك منها ولا ترغي فيها مع واحدة صاحبتك انا مش فاضيلك ..!! أقولك خدي العيال وسافروا وانا هجيلكم خميس وجمعة .
٦- هتحزن وتتوجع وتنقح عليها إحتياجاتها إنها تتشاف ، تتحب ، تتسمع ، إحتياج الفطره الأنثوي لذكر يهتم بيها ويغازلها ويشوف جمالها ويدلعها ؛ هيصعب عليها ضعفها وهي محتاجة راجل يحتويها ، ويقبل ضعفها ويطمنها ويقويها ، وإحتياجات كتير هتيجي تتطلبها منك وهي بتعيط بالدموع وانت بتتخانق معاها في أي حوار تافه تانى ، وهتقولها ساعتها أنتى بتدخلي الأمور في بعض وأنتى مش عايزة تشوفي نفسك غلطانه وعماله تقولي الكلام ده كله عشان أطلع انا في الآخر ما اتعاشرش ..!
٧- من كتر الوجع هتبدأ تبعد هتسمع كلامك وتشغل نفسها وتنجح في شغلها ، هتكتسب مع الوقت مهاره إنها تقوم بكل مسئوليات البيت اللي حضرتك راميها عليها ، وكمان تقوم بشغلها علي أكمل وجهه بدون تقصير في حاجة .
٨- هتنظم وقتها اكتر تبدأ تعمل علاقات جديدة مع ناس كتير في النادي ، و مدرسة ولادها وقرايبها وشغلها وفي نطاق إهتماماتها .
٩- هتبدأ تاخد الإهتمام والقبول والحب والتقدير من ناس كتير حواليها ، هترجع علاقتها بأهلها بقوه وتبدأ تستمد طاقة أمانها من أب او عّم او أخ او خال ، هتبدأ تشوف جمالها وتخس وتجدد من نفسها “عشان تظهر هذا الجمال وتشوفه كمان ف عيون الناس هتتكلم مع كل الناس ومش هتبقي عايزة تتكلم معاك انت بالأخص ..!!؟
في الخطوات 7 – 8 – 9 حضرتك هيبقي رد فعلك : الحمد لله إنها فكت عني ونزلت عن دماغي دول ستات فاضية ، ومخهم تعبان ..!
١٠- مش هيبقي ليك أي دور في المرحلة دي غير كونك ماكينة ATM بالنسبة لها لإن باقي إحتياجاتها النفسية انت اصريت إنها تاخدها من أي حد غيرك وهي مع الوقت نجحت في ده ، وهنا تاتى النقطة الفاصلة في العلاقة لأن أي ست حره وعندها إرادة لما بتحس أن هذا الشخص لا يقدم لها سوي المال وياخذ أمامه …. وبتكون هي كمان في المرحلة دي مفيش أي روابط نفسية تانية بتربطها بيه بتبدأ ترفض ذلك نفسياً وبشدة ومع أي مشكلة صغيرة تقرر الإنفصال بقوة وتصر عليه ، وحتي وهي غير مؤمنه مالياً “وهنا يكون رد فعل الراجل الغبي بالضغط عليها بالحاجات اللي ذكرتها فوق دي علها تتراجع عن موقفها ولكن للأسف لن تزيدها هذة الضغوط إلا كره له وإصرار أكثر علي البعد والإنفصال .
