كتب : مصطفى جاد
في ناس هتتحاسب على أعمار الناس اللي ضيعوها هدر هتتحاسب على كم الثقة والعشم والتفاني اللي رموها أصحابها في حجرهم وسابوهم في الاخر موجوعين تايهين مكسورين هتتحاسب على شهامة الناس معاهم وليهم و جدعنتهم وتضحياتهم اللي هما مقدروهاش ولا حتى أعترفوا بيها هتتحاسب على الذكريات الحلوة اللي اتزرعت جوا عقول اللي حبوهم وختموها بنهايات توجع قلوبهم وبدلوا الذكريات الحلوة بصدمات وفواجع يفضلوا فاكرينها طول حياتهم ناس هتتحاسب على كل روح سابوها معلقة مشتتة بدون مستقر وقرار يريح فكرهم و استخسروا فيهم شعور الراحة أو إنهم يتسابوا علي الأقل راضيين متطمنين كل واحد هيتحاسب بفواتير كتيرة جداً ما دفعهاش غير من عمر غيره وما كلفش نفسه عناء الوقوف فالطابور وشيل غيره ذنب الحطام بالكامل كل واحد هيتحاسب على كل قلب سابه مهزوم مقيم في دوامة الإحتياج والتعب وعلى كل روح سابها تعيش يتم المشاعر وهي في بداية ربيع العمر شابت وشالت هموم أكبر من عمرها بسبب أنانيته الفواتير هتخلص وهتدفع والحساب هيخلص في الدنيا قبل الآخرة فقبل ما تسيب وتدبح وتظلم استنى العدالة ونفس المشهد بالنسبة لك هيحصل مسالة وقت لا أكتر .
