كتب: مصطفى جاد
إحنا ليه مش قادرين نفهم إن العمر لحظة، وإن محدش ضامن عمره؟ اللي جاي مش قد اللي راح.
********
ليه لازم نقضي أيامنا في زعل وخصام؟ ليه كل واحد شايف إن كرامته فوق الجميع، وكل واحد حاسس إنه ملاك والباقي شياطين؟
********
مفيش حد ما بيغلطش، ومفيش حد ما بيتعصبش، ومفيش حد دايمًا صح.
********
إحنا بشر ولازم نخطئ، مش عايشين علشان ندور لبعض على أخطاء وذنوب، ونفضل نعاتب في بعض ونلوم.
********
بنزعل بالأيام والأسابيع والشهور على أي حاجة، سواء تستاهل أو متستاهلش، من غير ما نفكر إزاي نفرح ونعَدّي سوا الأيام الصعبة، وإزاي نشيل بعض ونحب بعض حتى بعيوبنا.
********
ليه مع كل غلطة ندور في القديم ونعيد ونزيد في الجديد؟ ما بنفكرش لحظة إن الشخص اللي بنزعل منه ومش بنكلمه ممكن في لحظة ما يكونش معانا بكرة.
********
ليه دايمًا ما بنفكرش غير في نفسنا وكرامتنا ومشاعرنا واهتمامتنا وننسى غيرنا؟
********
اليوم اللي بيعدي عمره ما هيرجع تاني.
********
هيفيد بإيه الزعل والخصام والبعد والفراق؟ هناخد إيه من اللوم والعتاب طول الوقت؟ إحنا مش ملايكة ولا أنبياء.
********
افتكروا إن في حاجة اسمها تسامح وعفو، افتكروا الحب، افتكروا أي حاجة حلوة كانت بينكم، افتكروا كويس كنتم فين وبقيتم فين.
********
نتعلم إزاي نسامح بدل ما نزعل ونعاتب ونقاطع بعض.
********
اللي بيحب عمره ما يعرف يكره ولا يغضب ولا يقسّي ولا يبعد ولا ينتقم.
********
إحنا بشر جوانا قلوب ربنا خلقها علشان تحب وتعطف وتسامح.
********
وياريت اللي ما بيعرفش يحب ولا يسامح يدور على عالم مفيش فيه بشر ويعيش فيه.
********
