مذبحة الطمع في الرتاج لما الدهب يبقى إله وتعبدوه بدم أخوك
✍️ : مصطفى جاد – أسوان
الرتاج دفنت أخوة.. وطلعت جشع في الرتاج.. مفيش قتل حصل النهاردة اللي حصل إن “الطمع” دبح “الأخوة” على باب الطاحونة.
المشهد أخوين.. لحم من لحم واحد تربوا على لقمة واحدة ناموا في حضن أم واحدة صحيوا الصبح لقوا بينهم بندقية
شاف أخوه “منافس* مش سند.. مش ضهر.. مش دم شافه “عائق” قدام جرام دهب زيادة.
فـ سحب السلاح.. وفرغ فيه رصاص الغدر وقع ميت ومعاه ماتت كلمة “أخويا” من قاموس الرتاج.
السبب؟ الساحر الأصفر.. الذهب الملعون اللي بيخليك تشوف أخوك فلوس ماشية على رجلين
اللي بيخليك تنسى إن الأم دي دعتلكوه انته الاتنين اللي بيخليك تبيع ضهرك عشان كام جنيه والمصيبة الأكبر؟
الجاني هارب أصلاً من أحكام
يعني معندوش حاجة يخسرها
لا سمعة.. لا دين.. لا نخوة راجل باع آخر حاجة كانت باقياله دمه.
اسمع كويس يا اللي لسه واقف على باب الطاحونة الدهب اللي بيجي بدم أخوك هتصرفه على محاميك.. وعلى كفنك.. وعلى عزاك.
الفلوس اللي بتطلع من طاحونة فيها دم حرام.. ونار.. وخراب بيت
الرزق الأصفر ده لو دخل قلبك
هيطلع منه كل حاجة نضيفة.. ويسيبك فاضي من جوه.
أهالي الرتاج النهارده بيدفنوا ميتين ميت اسمه “صالح” وميت اسمه “الرحمة بين الناس”
والأمن بيجري ورا الهارب بس مين هيجري ورا الطمع اللي في قلوبنا كلنا؟
رسالة من قلب الحدث يا بتوع الطواحين.. يا بتوع الرزق السريع الرزق اللي بيجي بدم.. بيروح بدم أخوك لو وقع النهاردة عشانك
بكرة أنت هتقع عشان غيرك دي دورة.. والطمع ما بيخلصش غير لما يخلص عليك.
الخلاصة اللي لازم تتحفر في قلب كل واحد شيطان الذهب دخل الرتاج مبتسم وطلع شايل كفن وماشي بيضحك.
لو الدهب أغلى عندك من أخوك
يبقى أنت اللي ميت.. وهو اللي عاش ربنا يرحم صالح ويكشف ستر إبراهيم لو لسه فيه أمل
ويحفظ بيوتنا من “الرزق
الأصفر” اللي بيحرق الأخضر واليابس.
