كتب : مصطفى جاد
انك تطلق مراتك بعد شهرين جواز او حتى تفكر في الطلاق والمشاكل توصل بينكم لطريق مسدود.
معناها انك مفهمتش اصلاً انت بتتجوز ليه او امتى تتجوز حقيقة قدام عينى طلاق بعد شهرين.
اغلبنا فاهم الجواز غلط عشان كده لازم تركز فى امتى اتجوز ؟ وكلامى موجه للشباب و البنات.
اتجوز لما أعرف ان الزواج انتقال من حال مؤقت لحياة كاملة ننتقل فيها من خانة عدم التقيد بشيء مهما كانت الحياة في بيت الأهل أو بغير زواج إلى خانة المسؤولية الكاملة عن كل شي .
اتجوز لما افهم معنى وجود امرأة فى حياتى كانت مدللة فى بيت اهلها وتقريباً مش بتشيل طبق من مكانه وده الغالب وازاى اقدر ابنيها من جديد واخليها تفهم يعنى ايه بيت زوجية اتجوز لما أفهم ان ثلاثية الزواج مبنية على الرحمة والمودة والسكن ..الرحمة بتتمثل في معرفة ان المرأة ضعيفة يعنى لا اضرب والا العن والا اسب والا اخدها جارية والا حتى تسمعها أف.
والمودة يعنى انك تكسبها تبقى هى الوجود اللى بتنتمى ليه روحك تبقى فاهم معنى اذا اكرمها واذا كرهها لم يظلمها تبقى فاهم ان الحياة مشاركة لا مغالبة والسكن انك تفهم انها مش كنبة والا كرسى بيت مالوش حقوق بتحركه حضرتك زى ما انت عاوز.
انك تفهم ان بيتك مش لوكاندة بتيجى فيها على النوم.
انك تفهم معنى ” وصف ربنا “هن لباس لكم وانتم لباس لهن “.
إتجوز لما تفهم إن خير متاع الدنيا المرأة الصالحة اللى حياتكم انت وهى تكون طريق للجنة.
اتجوز لما تفهم معنى انك هتبقى اب بيهتم بولاده وبيتعب عشانهم وبيذاكرلهم وبيفسحهم وبيحرم نفسه من ملذات الحياة عشان بيلاقى طعمها فى بوق ولاده.
إتجوز لما تفهم ان ممكن عيل صغير ميخليش امه تنام طول الليل وان انت في المقابل ممكن تخليها ترتاح وتشيله عنها شوية ” مع إنك مش هتقدر ” بس يكفى انك بتقولها انا حاسس بتعبك.
اتجوز لما تحس ان مفيش حاجة في الدنيا لا قهوة والا كورة والا صاحب ممكن يسرق منك وقت احق بيه اولادك اتجوز لما تحس انك راجل يعتمد عليه ..اتجوز لما تحس بأنك فعلا فاهم يعنى ايه جواز .
