سـيكلوجية المؤذي
٠٠٠٠٠٠٠٠٠٠٠٠٠٠٠٠٠٠٠٠٠٠٠٠
مصطفى جاد – أسوان
٠٠٠٠٠٠٠٠٠٠٠٠٠٠٠٠٠٠٠٠٠٠٠٠
هو ممكن حد يكرهنا بدون سبب وممكن كمان يأذينا عادي بدون سبب ؟ اااه ممكن عادي جداً
طب ليه من غير ما نعمله حاجة؟
ما هو لو عملت للشخص حاجـة وكرهك كدا ما يبقاش اسمه أذي كدا رد فعل طبيعي للي قدمته أنت
لكن الكره والأذي بيكونوا بلا أي سبب زي ما الحب كدا ما لوش سبب اللي بيكرهك ده هو في الواقع شخص كاره لنفسه أولاً واحدة بتحكي بتقول أول مرة تعرضت فيها لزميلة في الشغل بتأذيني بدون سبب وتضرني بدون سبب لما واجهتها بتصرفاتها لقيتها بتتهمني إنها فهماني وعارفة إني لا طيبة ولا حاجة وكل ده وش تمثيل بالتالي أدت لنفسها الحق إنها تأذيني يعني دخلت في نيتي وضميري وحكمت كمان وأتصرفت
الشخصية دي اللي مثلتها نجمة إبراهيم في فيلم ريا وسكينة وهي بتقول بنت الحرام وأنا بخنقها عضتني تقول ش عدوتها
الشخص المؤذي بالفعل بيكون مصدق إنه علي حق وبيخلق بخياله حالة وهم ويصدقها ويعيش فيها ويبدأ يتعامل علي أساسها يعني فعلياً الشخص المؤذي دا شخص مريض ومرضه خطير ومضر والتعامل معاه يكون من تصرفين لا ثالث لهما :–
أبعد عنه بالمشوار و أقطع أي علاقة ليك معاه سيبك منه لو أستمر في أذيتك وتعقبك واجهه بكل شراسة وخد حقك منه بكل قوة لأن الشخصية اللي زي دي بتكون غاية في الجُبن أهم حاجة تتوقف انت عن حالة الإندهاش اللي بتجيلك مع الأذية وتقول هو أنا عملت فيهم حاجة علشان يعملوا معايا كدا يا سيدي هو الأذي كدا ما تندهش بقي خد حقك ودافع عنه وأفهم إنك في دنيا مش في جنة و أفتكر إن قابيل لما قتل هابيل مكانش الأخير مؤذي لكن ده ميلاد الشر والشر موجود زي ما بالظبط الخير موجود المهم تستعد لمواجهته وتتعلم إزاي تحمي حدودك وتدافع عنها وتبطل إندهاش .
