كتب : مصطفى جاد
كانت شعبيته واسعة جدا و الشباب اللي بيحضروا حفلاته بالآلاف و ممكن يسافروا ليه سفر لدرجة إنه كان بياخد 30 ألف في الليلة الواحدة .
بلغنا خبر وفاته في حادث تصادم سيارتين ، رحمة الله عليه و غفر لنا و له و أدخله فسيح جناته .
بعيدا عن الراجل – ربنا يرحمه و يحسن إليه – أنت كواحد كنت بتسمع ليه ، أو بتسمع أي حفلات أو أي أغاني عموما ، موقف موته المفاجيء ده خلاك تفكر ازاي أو تاخد قرار بأيه ؟!
ماهو الموقف ده لو مش أثر في حياتك و خلاك تتغير مظنش إنك هتتغير أبدا أبدا بأي حاجة تاني
الراجل دخل العالم ، كتابه اتقفل على كدة ميقدرش يرجع يكتب فيه أي حسنة أو سيئة ، و أنت هتاجي فجأة هتلاقي نفسك هناك
يا ترى مستعد ليها اللحظة دي ؟!
أيه اللي قريته أو سمعته و تعرفه عن عالم القبر و البرزخ و الموتى و الآخرة و الملائكة و النعيم و العذاب و اللي هيحصل معاك هناك ؟!
طبعا مش فاضي للكلام ده ،
للأسف هتتصدم لما فجأة تلاقي نفسك وقعت فيه ،
زي ما محمد فوزي الله يرحمه مكنش في باله إن النهاردة تبقى نهاية رحلته ، و عمره ما اتخيل أنه هيموت في اللحظة دي ، مات الراجل ، راحت خلاص ليالي الأنس و لمة الأحباب ، و بقينا لوحدينا و محدش من الآلاف دي دخل معانا يونسنا تحت ، و أنت يمكن لحظتك قربت ، فخليك مستعد يا بطل ،
ربنا يحسن خواتيمنا ، احذفوا أغاني الراجل و متبقوش سبب في نشر سيئاته ، و هو في قبره ،
و محدش ينشر ليه صور ، و هو بيغني أو يعزف مينفعش .
