بقلم/ صباح محمد علي
والظهر لما انحنى
ورجلي ما شالتنيش
والرعشة مسكت إيديا
والفقر ما رحمنيش
والعقل بيتوه مني
وخلاص مش قادرة أعيش
*****
بعتلك المراسيل يا ابني
ليه بقى مجتنيش؟
جعانة وشديت الحزام على بطني
ومحتاجة لرغيف العيش
إيه اللي منعك تجيني؟
بقالك سنين ما شفتنيش
*****
ولاد الحلال قالوا لي أروحلك
بس مراتك مبتحبنيش
مش عايزة أسبب لك مشاكل
عشان يا ابني ما تكرهنيش
*****
وحشتني أوي يا ابني
وصورتك أبدا ما تسبنيش
وكل يوم أنده عليك
ما هو غيرك ليا مليش
*****
الأغراب بيعطفوا عليا
بس عطفهم عنك معوضنيش
نفسي أشوفك وتشوفني
خايفة أموت وأوحشك ما تلقنيش
*****
ويتسلط عليك عذاب الضمير
ويعذبك الندم وما يرضنيش
بر الوالدين فرض ربك
وإنت يا ابني ما برتنيش
*****
خايفة تشوف اللي شفته
وتحتاج لبر ابنك ما تلقهوش
*****
