بقلم/ الأستاذة صباح محمد علي
ليه الناس مبقوش حلوين من جواهم؟
ليه القلوب مش صافية؟ ليه الغل والحقد والكره سيطروا على الكل ومحدش طايق حد؟
ليه الخصام زاد والفجر عشش؟ ليه الغلط سايد والصح ملوش مكان؟ ليه كارهين الخير لبعض؟ ليه في نفاق ومجاملة في الغلط؟ ليه التطبيل وقلة الحيلة وقلة الحياء؟
ليه بنلوم على الأيام والزمن، والغلطة فينا؟ ليه البركة راحت والطعم مر؟
ليه المشاكل بقت أسلوب حياة؟ ليه مفيش نظام ومفيش عدل؟ ليه الظلم والجشع والطمع؟ ليه بقينا كدا؟ ليه وصلنا لكدا؟
ليه بقينا إحنا دلوقتي ومش إحنا زمان؟ ليه مفيش جبر خواطر؟
ليه الكلمة الحلوة اتنست؟ أكيد في حاجة غلط.
ماهو لما تنقلب الحقائق، يبقى أكيد في شيء غلط.
لما تبقى الطيبة هبل، يبقى في شيء غلط.
لما تبقى المناقشة جدال، يبقى في شيء غلط.
لما يبقى النقد تجاوز، يبقى في شيء غلط.
لما تبقى مطالبتك بالحق قلة أدب، يبقى في شيء غلط.
لما تبقى تعبيرك عن حبك جرأة، يبقى في شيء غلط.
لما يبقى صمتك ضعف، يبقى في شيء غلط.
لما تبقى تعبيرك عن رأيك اندفاع وتهور، يبقى في شيء غلط.
لما تبقى الفضيلة رجعية، لما يبقى شطارتك وذكاءك فهلوة،
لما يبقى الصوت العالي حق، ولما يبقى حبك الحقيقي سذاجة،
لما يبقى تمهلك سلبية، ولما يبقى صمتك قبول،
لما تبقى ابتسامتك وضحكتك قلة أدب، ولما يبقى حياءك قلة خبرة،
يبقى في حاجات غلط. معقول إلى هذا الحد انقلبت المعايير والموازين؟
