مومياء عمك وعمي وعم المصريين كلهم، الملك أحمس الأول.
بقلم. كرم المصري
حتة عيل مسك حكم مصر وهو عنده 10 سنين، ولما بقى عنده 19 سنة قدر يهزم بمفرده الهكسوس اللي قعدوا يسرقوا وينهبوا ويخربوا في حكم مصر ومعابدها وخيراتها 100 سنة بحالها..
وهو عنده 19 سنة بس، والهكسوس محاوطينه من شمال مصر، وملوك النوبة متفقين معاهم من جنوب مصر وعاملين عليه كماشة في طيبة، قدر يهزم الهكسوس بكل جيشهم وطلع يجري وراهم لغاية عاصمتهم في مصر هنا جمب الزقازيق كده. وقتل كل اللي موجودين هناك، وفضل ورا اللي هربوا في باقي الدلتا ودبح فيهم، هربوا على سينا وما سابهمش، كمل وراهم واقتل اقتل، طلعوا على فلسطين، ما سابهمش وكمل وراهم لغاية ما حرفياً قضى نهائي على الشعوب البدوية دي ومعدش ليهم وجود تاني في التاريخ وكمل بعدها للبنان كده يشوف في حد عنده شوق لحاجة ولا محتاجه.
رجع على مصر ودور على كل المصريين اللي تعاونوا مع الهكسوس على اخوانهم المصريين، وحبس وقتل.. بعت 3 جيوش في 3 حملات مختلفة للنوبة مش انتم بتتأمروا علينا مع اعدائنا! هات الملك بتاعهم وربوه قدام الشعب كله عبره ليهم، وارجعوا تاني يا كلاب تحت السيادة المصرية..
راح خد جيش مصر وعمل اسطول بحري لإنه كان عندنا بري فقط، وقام داخل على اراضي شبه الجزيرة العربية، وفلسطين ورجعهم تاني تحت حكمنا.. خلى حدود مصر من تونس في الغرب لإيران في الشرق، ومن تركيا في الشمال للقرن الإفريقي في الجنوب.. كان ساعتها مصر أكبر إمبراطورية على وجه الأرض ومفيش ملك بيعرف يرفع عينه في عنيها كده..
وبعد ماتطمن انه خلاص مفيش حد يقدر يهدد الدولة المصرية ولا يكرر فعلة الهكسوس، قالك اهتم بقى بمصر نفسها داخليا، فراح لكل المعابد والجدران وأي حاجة دمرها وخربها الهكسوس الهمج، وأمر ببنائها من أول وجديد واعادة تزينها.. كل الأراضي اللي اتخربت تتعاد زراعتها تاني و يتعملها نظام ري جديد، وكل اتفاقيات التجارة اللي كانت قبل ترجع وخلى مصر عروسة جديدة يا سعادة الباشا.. كل دا وهو ابن ال19 سنة.
مراته بقى اللي هي أخته اسمها أحمس-نفرتاري.. كانت قوية جداً جداً وذكية وماهرة لدرجة انها كانت قائدة في الجيش المصري اثناء ماهي ملكة وكانت بتحارب على رأس الجيش زيها زي زوجها زي اي جندي مصري.. كانت أول ملكة في تاريخ مصر تحارب مع الجيش لدرجة سموها عميدة الاسرة ال18 بعد زوجها مؤسس الاسرة.. المصريين من كتر ما كانوا بيحبوها وبيقدروها، كانوا بيألهوها.. تعتبر أكثر مرأة تم تقديرها في تاريخ ملكات مصر كلها من الشعب.
