كتب : مصطفى جاد
أول عقاب من ربنا لسيدنا آدم نتيجة عصيانه وأكله من الشجرة مكنش هو الخروج من الجنة زي ماحنا فاكرين.
– أول عقاب لسيدنا آدم كان هو نزع الستر عنه هو و ستنا حواء إقرأ قوله تعالي :- “فأكلا منها فبدت لهما سوآتهما وطفقا يخصفان عليهما من ورق الجنة”.
نزع الستر وكشف العورة كان أهم وأول وأكبر دليل على غضب ربنا سبحانه عليهم ف الوقت ده وكان أول درس مباشر لهم والشيئ المدهش ف الآية هو الفطرة اللي أتخلق عليها سيدنا آدم وأحنا من بعده .. بمعنى إيه ؟ بمعني أنه لما بدت سوآتهما وأنكشفت عوراتهما.
ما سابوش نفسهم كدا وكأن الموضوع عادي لا ده في نفس اللحظة دي اللي كان شاغلهم قوي.
هوَّ إزاي يداروا العورة دي ؟ويغطوها رغم أن مفيش أي مخلوق في الجنة والدنيا كلها إلا هما الأتنين بس يعني مفيش حد تاني شايفهم لأن ربنا كان لسه ما خلقش أي حد تاني وأول حاجة فكروا فيها وشغلت تفكيرهم هو تغطية عوراتهما نفهم من كدا إيه ؟ نفهم من كده أن أول علامات رضا ربنا عليك إنه يسترك و أول علامة علي أنك أنسان سَوِي وكمان علي الفطرة اللي ربنا خلقنا عليها هي إنك تسعى للستر .. اللهم أسترنا فوق الأرض وأسترنا تحت الأرض وأسترنا يوم العرض عليك يارب .
